[东方报]意甲：A米衝歐客W趁熱食[05-05]

啊木

今晚意甲獨腳戲，熱拿亞主場迎戰AC米蘭。A米仍要爭逐下屆歐洲賽資格，唔會hea踢，造訪無欲無求嘅熱拿亞，點都秤先，1.59倍熱W照捧。（周二凌晨2時45分開賽）

A米今季表現飄忽，好彩嚟到季尾有回勇迹象，唔單止擊退同市死敵國際米蘭，殺入意盃決賽，令士氣大振，加上聯賽仲有得爭下屆歐協聯參賽資格，今場勢必搏盡。查實「紅黑兵團」狀態唔曳，近4仗取得3勝1負，若單計聯賽作客，近4仗亦獲3勝，基斯甸普列錫、辛迪亞高基文尼斯頻有士哥，信心確係返晒嚟。

相反，熱拿亞愈踢愈沉，近5場只得1勝1和3負，仲要入得1粒咁大把，攻守都唔掂，其中喺上月底輸畀拉素，連之前主場硬淨嘅招牌都畀人拆埋，主帥韋拉亦冇晒符。

熱拿亞等放假無心戀戰
睇番熱拿亞依家排緊第13位，唔使憂降班，不過爭歐洲賽席位亦輪唔到佢哋，可謂正宗風流波。季尾波戰意行先，既然熱拿亞冇晒目標等放暑假，梗係捧番AC米蘭喇。